Sosial
05.12.2019 / 17:00

Komitə və ictimai fəal qadınlar ağacəkmə kampaniyasında iştirak edəcəklər

 Komitə və ictimai fəal qadınlar ağacəkmə kampaniyasında iştirak edəcəklər
Prezident İlham Əliyevin Sərəncamı ilə mütəfəkkir şair İmadəddin Nəsiminin 650 illik yubileyi ilə əlaqədar 2019-cu ilin “Nəsimi ili” elan edilməsi, Birinci vitse-prezident Mehriban Əliyevanın bir gündə 650 min ağac əkilməsi ilə bağlı təşəbbüsü böyük sənətkarın adının əbədiləşdirilməsi, beynəlxalq aləmdə təbliği, Azərbaycanın ədəbi və mədəni irsinin tanıdılması baxımından xüsusi əhəmiyyət daşıyır.

Bu təşəbbüs dahi şairin irsinin təbliği ilə bərabər, həm də ətraf mühitin mühafizəsinin vacibliyini insanların, xüsusilə gənc nəslin diqqətinə çatdırır və onları ekoloji problemlərin həllində birgə fəaliyyətə səsləyir.

Ekologiya və Təbii Sərvətlər Nazirliyi tərəfindən dekabrın 6-da Şamaxı yolunda yerləşən Pereküşkül ərazisində keçiriləcək kampaniyaya Alilə, Qadın və Uşaq Problemləri üzrə Dövlət Komitəsi də qoşularaq yaxından iştirak edəcək.

Komitənin İnformasiya və analitik araşdırmalar şöbəsindən İnform.az-a verilən məlumata görə, ekoloji vəziyyətin yaxşılaşdırılması, yaşıllıqların artırılması, ağac əkilməsinin təşviqi məqsədilə keçirilən ağacəkmə kampaniyası çərçivəsində Komitənin Uşaq və Ailələrə Dəstək Mərkəzinin əməkdaşları, ictimai fəal qadınlar və qeyri-hökumət təşkilatlarının nümayəndələri də iştirak edəcəkdir.

Kampaniya çərçivəsində meşə və qeyri meşə fondu ərazilərində iqlimə və relyef şəraitinə uyğun müxtəlif növlü ağaclar əkiləcəkdir.

BMT-nin tövsiyyələrinə əsasən, ətraf mühitin qorunması və gender bərabərliyinin təmin edilməsi sıx kəsişən və prioritet məsələlərdən biridir və ölkələrin iqtisadi və sosial inkişafına təsir göstərir.

Qeyd edək ki, Dayanıqlı İnkişaf Məqsədlərinin 15-ci hədəfi Ekosistemlərin dayanıqlı istifadəsini müdafiə, bərpa və təbliğ etmək, meşələri dayanıqlı idarə etmək, səhralaşma ilə mübarizə aparmaq, torpaq deqradasiyasının qarşısını almaq və dayandırmaq, o cümlədən biomüxtəliflik itkisini dayandırmaqdan ibarətdir.


İnform.az


















Baxış sayı: 1245